ముస్తాబాద, (గన్నవరం):యేసు క్రీస్తు మృత్యువును జయించి పునరుత్థానుడై తిరిగి లేచిన రోజు ఈస్టర్ పండుగ అని రెవరెండ్ ఫాదర్ ఆకుల ధర్మరాజు తెలిపారు. మండలంలో ఈస్టర్ పండుగను క్రైస్తవ సోదరులు ఘనంగా ఆదివారం జరుపుకున్నారు. ముస్తాబాద ఫాతిమామాత ఆలయంలో జరిగిన ఈస్టర్ వేడుకల్లో ముఖ్య అతిధిగా పాల్గొన్న రెవరెండ్ ఫాదర్ ధర్మరాజు ప్రసంగిస్తూ యేసు క్రీస్తు చనిపోయి తిరిగి మూడవ రోజు పునర ద్దానుడై సజీవంగా వచ్చిన రోజు అందరికీ సంతోషాన్ని పంచిందన్నారు. లోక రక్షకుడు ప్రభువు అయిన యేసు క్రీస్తు అని చెప్పారు. విచారణ గురువులు రెవరెండ్ ఫాదర్ ఆంథోని బాలజోసఫ్ ప్రసంగిస్తూ భక్తి శ్రద్ధలతో తపస్సుకాల దీక్షలను పూర్తి చేసిన వారికి శుభాకాంక్షలు తెలిపారు. నిత్యం క్రీస్తును ఆరాధిస్తూ ఉండాలన్నారు. ఈ నెల 29 నుంచి నవదిన ప్రార్ధనలు ప్రారంభమవుతాయని తెలిపారు. రెవరెండ్ ఫాదర్ రాయప్పరెడ్డి, సంఘపెద్దలు, మరియదళం సభ్యులు మఠ కన్యలు తదితరులు పాల్గొన్నారు.
