తెలుగు తేజం హనుమాన్ జంక్షన్ : కృష్ణా జిల్లాలోని హనుమాన్ జంక్షన్ పోలీసుస్టేషన్ పరిధిలో బాపులపాడు మండలం బొమ్ములూరు గ్రామం సమీపంలో సోమవారం తెల్లవారుజామున 3.౩౦ గంటలకు ఘోర రోడ్డు ప్రమాదం జరిగింది. ఈ ప్రమాదంలో ముగ్గురు అక్కడికక్కడే మృతి చెందగా… మరో నలుగురు తీవ్రంగా గాయపడ్డారు. ఆగి ఉన్న లారీని కారు ఢీకొనడంతో ఈ ప్రమాదం జరిగింది. సమాచారం అందిన వెంటనే పోలీసులు అక్కడకు చేరుకుని గాయపడిన వారిని స్థానిక ఆస్పత్రికి తరలించారు. మృతదేహాలను నూజివీడు ప్రభుత్వ ఆసుపత్రికి తరలించారు. మృతులు విజయవాడకు చెందిన చీమకుర్తి నాగేశ్వరరావు(75), చింతలపూడి మండలం ఎర్రగొండపల్లి గ్రామానికి చెందిన దంపతులు తాతారావు (65), కనకదుర్గ(60) గా గుర్తించారు. భీమవరం వివాహ వేడుకల్లో పాల్గొని తిరిగి నూజివీడు ఇంటికి వస్తుండగా ప్రమాదం చోటు చేసుకుంది. ప్రమాద సమయంలో కారులో మొత్తం ఏడుగురు ఉన్నారు. ఈ దుర్ఘటనపై పోలీసులు కేసు నమోదు చేసి దర్యాప్తు చేపట్టారు.
