హైదరాబాద్: తెలంగాణ రాష్ట్ర పబ్లిక్ సర్వీస్ కమిషన్(టీఎస్‌పీఎస్‌సీ) తాత్కాలిక ఛైర్మన్‌గా సీహెచ్ సాయిలు నియమితులయ్యారు. ఈ మేరకు రాష్ట్ర ప్రభుత్వం ఉత్తర్వులు జారీ చేసింది. ప్రస్తుతం తాత్కాలిక ఛైర్మన్‌గా ఉన్న కృష్ణారెడ్డి పదవీకాలం ఈనెల 18న ముగిసింది. టీఎస్‌పీఎస్‌సీ సభ్యుల్లో ప్రస్తుతం సాయిలు ఒక్కరే ఉన్నారు. సభ్యుడిగా సాయిలు పదవీకాలం నవంబరు 1 వరకు ఉంది. పూర్తిస్థాయి ఛైర్మన్‌ను నియమించే వరకు లేదా సాయిలు పదవీకాలం ముగిసేవరకు ఆయన తాత్కాలిక ఛైర్మన్‌గా కొనసాగుతారని ఉత్తర్వుల్లో ప్రభుత్వం పేర్కొంది. ప్రభుత్వ ఉత్తర్వుల నేపథ్యంలో సాయిలు ఇవాళ కమిషన్ తాత్కాలిక ఛైర్మన్‌గా బాధ్యతలు స్వీకరించారు.
